Tema 6: As programacións didácticas vixentes (Gonzalo)

 As programacións didácticas vixentes

O tema 6, que versa sobre as programacións didácticas vixentes, desempeñou un papel fundamental á hora de actualizar, asimilar e acomodar coñecementos relativos ás programacións didácticas. Non obstante, tamén nos permitiu ampliar o noso coñecemento en relación aos procesos selectivos que proporcionan acceso á función pública docente. De feito, na miña opinión, foi un tema moi útil porque nos proporcionou información de interese para o noso futuro.              

En canto á organización das sesións, só puidemos dedicarlle a sesión do once de decembro, pero aínda así tivemos tempo de comentar todos os aspectos relevantes. Para comezar, o docente dedicou a primeira parte da sesión a explicarnos a normativa sobre as oposicións, que se dividen nunha fase de concurso (40 %) e noutra de oposición (60 %). Dentro desta explicación, pareceume interesante que puidésemos comentar o baremo que se emprega para valorar os méritos da primeira fase, posto que así podemos ir informándonos sobre algún curso que nos permita obter puntos ou acreditar o nivel que posuímos nas linguas estranxeiras.

Neste sentido, dado que falamos de cursos beneficiosos para a oposición, o docente puxo exemplos reais de cursos homologados pola Consellería de Educación ou cursos que podemos realizar, como os ANPE, os da UNED, os da CIG Ensino, os do STEG, etc. Persoalmente, eu non coñecía a maioría de exemplos que se facilitaron, polo que agradecín esa orientación, xa que, normalmente, non se abordan estes temas na aula. De feito, consultei algúns dos sindicatos ou organizacións das que se falaron e atopei cursos bastante atractivos. A modo de exemplo, dentro de ANPE, hai cursos para opositores como este, que está certificado pola Universidade Nebrija e está centrado en descubrir as potencialidades de Internet para fomentar a aplicación das conexións telemáticas na aula como un novo recurso didáctico.

Fonte: ANPE.

No que respecta á segunda fase, o docente explicounos que esta está dividida en dúas probas. Por unha banda, atópase a primeira, que consta de dúas partes: a parte A, que inclúe unha proba práctica con exercicios, e a parte B, que consiste en desenvolver un dos temas que forman parte do temario. Unha vez rematada, o candidato ou candidata debe lela ante o tribunal, polo que ten que intentar desenvolver os temas da mellor maneira posible e ser fiel ao que escribiu na lectura pública.

No que atinxe á parte A desta proba, segundo o baremo de oposicións de 2020, os candidatos e candidatas de inglés deben realizar un exercicio de respostas a preguntas formuladas sobre o uso funcional da lingua, con cuestións sobre aspectos lingüísticos, literarios ou socioculturais, a partir dun texto en prosa en lingua inglesa. Porén, segundo as experiencias dalgún docente que participou na charla organizada por Carla, o tipo de preguntas que se realizan non son acordes ás cuestións que se deberían formular sobre o uso funcional da lingua e exixen un nivel sumamente alto.

Por outra banda, a segunda proba tamén abrangue dúas partes: a parte A implica presentar e defender unha programación didáctica organizada en quince unidades didácticas e a parte B fundaméntase na exposición dunha unidade didáctica ante o tribunal. Neste caso, o docente presentounos as características que debe posuír unha programación, que me serviron para aclarar as miñas ideas e entender que a unidade didáctica que elaborara en materias anteriores non se correspondía co formato requirido. Dado que a extensión da programación non pode superar os sesenta folios sen incluír os anexos, cada unidade didáctica debe ocupar, aproximadamente, dous folios escritos a unha soa cara.

Alén destes aspectos, a segunda parte da sesión estivo dedicada a explicarnos a tarefa que debiamos levar a cabo de xeito individual. Dado que estivemos falando das características que debía ter unha programación, o docente pediunos que elaborásemos unha programación didáctica conxunta. Durante o proceso, dividiunos en grupos e asignounos unha parte da programación a cada un, aínda que deixou á parte o apartado das unidades didácticas. No meu caso, eu traballei coa miña compañeira Antía na parte das actividades complementarias, así que deseñamos actividades que se puideran introducir despois nas unidades didácticas. Para facelo, consultamos as programacións didácticas dalgúns centros, co obxectivo de analizar puntos comúns que nos puidesen servir de axuda. Así, posteriormente, redactamos as actividades e establecemos a súa descrición, a temporización, o espazo e os recursos precisos para levalas a cabo. 

Aquí podedes botarlle un ollo á nosa parte e ao resultado final da programación conxunta. Tamén vos deixo un vídeo interesante sobre as situacións de aprendizaxe, que vos pode ser útil á hora de elaborar as vosas unidades didácticas:

Unha vez deseñados os distintos apartados das programacións, o obxectivo da tarefa era que cada un elaborase unha unidade didáctica para unilas e conseguir unha programación completa. Ao principio parecía un labor difícil, pero tivemos a sorte de contar con recursos e materiais, entre os que se atopaba un modelo de unidade para Educación Secundaria Obrigatoria e Bacharelato. Ademais, o docente permitiunos adaptar os materiais que xa empregaramos nunha unidade didáctica anterior, polo que iso nos permitiu axilizar o proceso. Esta foi a miña creación:

Desde a miña perspectiva, a elaboración da programación e da unidade promoveu e incentivou as miñas competencias para sintetizar a información e os contidos, xa que a única unidade que elaborara tiña unha extensión desproporcionada e non acorde aos requisitos que se establecen nas oposicións. Así mesmo, o feito de levar a cabo unha programación entre todos fomentou o traballo colaborativo e a aprendizaxe entre iguais, posto que todos tiñamos que seleccionar información en base ao noso propósito para despois sintetizala e elaborar un produto final.

En definitiva, explorar o tema das programacións didácticas e o baremo das oposicións resultou ser unha experiencia enriquecedora que non só nos permitiu afondar na comprensión de contidos, senón que tamén nos axudou a traballar competencias clave como a competencia dixital, a lingüística, a cidadá e a persoal, social e de aprender a aprender. Ademais, tamén evidenciou a importancia do traballo colaborativo e da aprendizaxe autónoma, de xeito que todos tivemos a oportunidade de construír a nosa aprendizaxe mentres elaborabamos unha unidade didáctica.

Que opinades vós? Lereivos nos comentarios!